ប្ររព័ន្ធផ្សព្វផ្សាយកម្ពុជា និងប្រព័ន្ធផ្សព្វផ្សាយ នៃប្រទេសចិន បានតាំងចិត្តរួមគ្នាក្នុងការប្រយុទ្ធប្រឆាំងនឹងព័ត៌មានក្លែងក្លាយគ្រប់ទម្រង់ដែលបង្កើតឡើងដោយក្រុមអគតិ ដើម្បីចូលរួមថែរក្សានូវសុខសន្តិភាព ការអភិវឌ្ឍ និងការពារចំណងមិត្តភាពដែកថែប នៃប្រទេសទាំងពីរ។
ការតាំងចិត្តនេះ ក្នុងឱកាស លោក នេត្រ ភក្ត្រា រដ្ឋមន្ត្រីក្រសួងព័ត៌មាន បានទទួលជួបជាមួយ លោកស្រី ជឹង យៀន សមាជិកអចិន្ត្រៃយ៍ និងជាប្រធានផ្នែកឃោសនាការ នៃគណៈកម្មាធិការគណបក្សកុម្មុយនិស្តចិនខេត្តយូណាន ថ្នាក់ដឹកនាំ នៃមជ្ឈមណ្ឌលប្រព័ន្ធផ្សព្វផ្សាយខេត្តយូណាន ក្នុងវេទិកា នៃការបើកសម្ពោធកម្មវិធីសំឡេងបេតិកភណ្ឌ «ដើរកម្សាន្តនៅយូណាន ទៅទស្សនានៅអង្គរ» កាលពីថ្ងៃទី ៧ ខែមិថុនា ឆ្នាំ ២០២៤ កន្លងទៅ។
នាឱកាសនោះ លោក នេត្រ ភក្ត្រា គូសបញ្ជាក់ថា ព័ត៌មានក្លែងក្លាយ បាននិងកំពុងបង្កើតឡើង ចរាចរក្នុងបណ្ដាញទំនាក់ទំនងសង្គម បង្កផលប៉ះពាល់អវិជ្ជមានដល់សង្គម ព្រោះងាយស្រួលបង្កើត និងងាយស្រួលផ្សព្វផ្សាយ។
ទន្ទឹមនោះ លោក នេត្រ ភក្ត្រា ក៏បានស្នើដល់ប្រព័ន្ធផ្សព្វផ្សាយរដ្ឋ និងឯកជន នៃប្រទេសកម្ពុជា-ចិន ចូលរួមសហការគ្នាប្រឆាំងព័ត៌មានក្លែងក្លាយ ខណៈក្នុងសម័យឌីជីថលនេះ ព័ត៌មានក្លែងក្លាយជាច្រើន ត្រូវបានបង្កើតឡើង និងផ្សព្វផ្សាយលើបណ្ដាញទំនាក់ទំនងសង្គមបង្កប់ដោយរបៀបវារៈទុច្ចរិត បង្កើតឲ្យមានការយល់ច្រឡំ និងមានទិសដៅបំផ្លិចបំផ្លាញកិច្ចខិតខំប្រឹងប្រែងរបស់ភាគីទាំងពីរ លើការផ្សព្វផ្សាយពីសក្ដានុពលទេសចរណ៍ ការវិនិយោគ និងសកម្មភាពមនុស្សធម៌ផ្សេងៗ។
លោករដ្ឋមន្ត្រីក្រសួងព័ត៌មាន គូសបញ្ជាក់បន្តថា ក្រសួងព័ត៌មានកម្ពុជា បានដាក់ចុះនូវយន្តការ និងវិធានការ នៃការប្រយុទ្ធប្រឆាំងព័ត៌មានក្លែងក្លាយគ្រប់ទម្រង់ ដោយប្រើប្រាស់យុទ្ធសាស្ត្រ ៣ ប គឺ «បញ្ជ្រាប បន្សាប និង បង្ក្រាប»។ សម្រាប់បច្ចុប្បន្ន ក្រសួងព័ត៌មាន បាននិងកំពុងអនុវត្តកិច្ចការនេះ យ៉ាងយកចិត្តទុកដាក់បំផុត។ បន្ថែមនោះ ដើម្បីអនុវត្តការងារនេះ ក្រសួងព័ត៌មាន បានបង្កើតគណៈកម្មាធិការប្រឆាំងព័ត៌មានក្លែងក្លាយ ដោយមានការចូលរួមពីក្រសួង-ស្ថាប័នពាក់ព័ន្ធ។ ជាលទ្ធផល ក្នុងឆ្នាំ ២០២៣ កន្លងទៅនេះ ព័ត៌មានក្លែងក្លាយជាង ៣ ពាន់ ត្រូវបានកត់ត្រា ហើយករណីខ្លះ ត្រូវបានចាត់វិធានការតាមនីតិវិធីច្បាប់។
លោករដ្ឋមន្ត្រីក្រសួងព័ត៌មាន ក៏បានលើកឡើងថា មានការបង្កើតព័ត៌មានក្លែងក្លាយជាច្រើនតាមប្រព័ន្ធទំនាក់ទំនងសង្គមដែលបានជះឥទ្ធិពលដល់ការផ្សព្វផ្សាយពីទេសចរណ៍ និងវប្បធម៌។
ជាមួយនេះ លោករដ្ឋមន្ត្រី បានអំពាវនាវដល់ប្រជាពលរដ្ឋកម្ពុជា និង ចិន សូមកុំជឿលើការផ្សព្វផ្សាយព័ត៌មានមិនពិតនៅលើបណ្ដាញទំនាក់ទំនងសង្គមដែលគ្មានប្រភពពិតប្រាកដ និងត្រូវជឿជាក់លើការផ្សព្វផ្សាយព័ត៌មានវិជ្ជាជីវៈ នៃប្រព័ន្ធផ្សព្វផ្សាយផ្លូវការ។
លោក នេត្រ ភក្ត្រា លើកឡើងបន្ថែមថា ការទប់ស្កាត់ និងលុបបំបាត់ព័ត៌មានក្លែងក្លាយគ្រប់ទម្រង់ ជាភារកិច្ចរួមរបស់អ្នកសារព័ត៌មាន ដើម្បីពង្រឹងសន្តិសុខព័ត៌មាន ផ្តល់សុវត្ថិភាពព័ត៌មានជូនអ្នកប្រើប្រាស់ កាត់បន្ថយផលប៉ះពាល់ផ្សេងៗ ដល់សង្គម និងអ្នកទទួលព័ត៌មាន ដែលបង្កឡើងដោយការផ្សព្វផ្សាយព័ត៌មានក្លែងក្លាយ។
លោក នេត្រ ភក្ត្រា បានជម្រាបជូនភាគីចិន ថា ក្រសួងព័ត៌មាន គ្រោងនឹងដឹកនាំធ្វើយុទ្ធនាការប្រឆាំងព័ត៌មានក្លែងក្លាយ នាពេលខាងមុខ និងមានបំណងពង្រីកយុទ្ធនាការប្រឆាំងព័ត៌មានក្លែងក្លាយនេះ ក្នុងក្របខណ្ឌទូលំទូលាយ ព្រោះថា បញ្ហាព័ត៌មានក្លែងក្លាយ ជាបញ្ហារួម និងប្រទេសទាំងអស់ តែងតែជួបប្រទះនូវបញ្ហាទាំងនេះ ដែលទាមទារឲ្យទាំងអស់គ្នា ត្រូវរួមសហការប្រយុទ្ធប្រឆាំង។
លោករដ្ឋមន្ត្រីក្រសួងព័ត៌មាន ក៏បានជម្រាបជូនភាគីចិន បន្ថែមថា ការរួមគ្នាប្រយុទ្ធប្រឆាំងនឹងព័ត៌មានក្លែងក្លាយ ដើម្បីគោលដៅពង្រឹងសន្តិសុខព័ត៌មាន និងផ្តល់សុវត្ថិភាពព័ត៌មានសម្រាប់អ្នកប្រើប្រាស់ ក៏ដូចជាការពារនូវកេរ្តិ៍ឈ្មោះកិត្តិយសប្រជាជាតិទាំង ២។ យុទ្ធនាការដែលបានគាំទ្រដោយប្រព័ន្ធផ្សព្វផ្សាយកម្ពុជា និងចិន។
បន្ទាប់ពី លោក នេត្រ ភក្ត្រា ជម្រាបជូន ភាគីចិន រួច លោកស្រី ជឹង យៀន ប្រធានផ្នែកឃោសនាការ នៃគណៈកម្មាធិការគណបក្សកុម្មុយនិស្តចិនខេត្តយូណាន ក៏ដូចជាប្រព័ន្ធផ្សព្វផ្សាយនៅខេត្តយូណាន បានគាំទ្រចំពោះគំនិតផ្ដួចផ្ដើមនេះ និងសន្យាសហការជាមួយកម្ពុជាលើកិច្ចការនេះ៕
No comments:
Post a Comment